“Crimea Global. Understanding Ukraine Through the South” halqara konferentsiyası çerçivesinde, Ukraina devlet memurları, Ukrainanıñ milliy deputatları ile dünyanıñ farqlı devletlerinden kelgen ekspert, içtima, media ve ilim saalarınıñ temsilcileri arasında bir körüşüv keçti.

“Crimea Global. Understanding Ukraine Through the South” halqara konferentsiyası çerçivesinde, Ukraina devlet memurları, Ukrainanıñ milliy deputatları ve dünyanıñ farqlı devletlerinden kelgen ekspert, içtima, media ve ilim saalarınıñ temsilcileri arasında bir körüşüv keçti. Dünyadan toplaşqan temsilciler İndistan, İndoneziya, Katar, Malayziya, Nikaragua, Urugvay, Keniya, Fillipinler, Türkiye, Avstriya, Estoniya, Argentina, Meksika ve diger devletlerden kelgen ediler.

Körüşüv sırasında “Özek silâlı devlet ile tam miqyaslı cenkniñ neticelerini Ukraina nasıl aşa” mevzusında muzakere keçti. Tedbirniñ moderatorı – ukrain jurnalist Nataliya Ğumenük.

Tögerek masada Ukraina baş prokurorı Andriy Kostin, Avrointegratsiya meselelerinde dijital transformatsiya naziriniñ muavini Valeriya İonan, Ukrainada içtima, topraq ve infrastruktura inkişafı naziriniñ muavini Mustafa-Masi Nayem, Prezidentniñ Qırım Muhtar Cumhuriyetindeki Daimiy Vekili Tamila Taşeva, Ukraina Tış işleri nazirliginiñ siyasiy departamentiniñ müdiri Lübov Nepop, Prezident ofisiniñ idareci keñeşçisi Oleksandr Bevz ve Ukraina halq mebusları Alöna Şkrum, Yeğor Çernev, Serğiy Babak iştirak ettiler.

Subet vaqtında Ukraina ükümet organları temsilcileri tam miqyaslı cenk neticelerini aşmaq içün devlet tarafından kerçekleştirilgen esas adım ve yönelişler aqqında ayttılar ve yapqan cinayetleri içün Rusiyeniñ mesül olması kerek olğanını ayrıca qayd ettiler. Hususan, spikerler çeşit dünya regionlarından ekspertlerniñ teşrif etmesi tek birdemlik işareti degil de, Ukraina ile birdemlikni köstergen kerçek bir adım olmasını ayttı. Ukraina baş prokurorı Andriy Kostin: “Rusiye öz yañı müstemleke politikasını ömürge keçire ve dünya birleşken olmalı ki, kerçek ep yañğırasın ve er angi bir agressornıñ öz cinayetleri içün mesül olacağı kösterilsin. Çünki biz halqara sanasında küçlü ve birleşken olsaq, agressor yañıdan bir cinayet işlemekten evel üç kere tüşünir”, – dep qayd etti. Ukraina halq mebusı Yeğor Çernev: “Rusiye yeñse, dünya nizamı bozuldı demektir. Bu avtokratiya ve demokratiya arasında bir cenktir. Bizge halqara ortaqlardan çeşit yönelişlerde yardım kerektir, hususan da adalet saasında, yañlış bildirüvge qarşı küreşte, silâ berilmesinde. Çünki duşmannı yeñmek içün bizge küçlerimizni birleştirmek kerek”, – dep ayttı. Ukraina halq mebusı Alöna Şkrum Rusiye yeñilmese, makemege çekilmese, bu, halqara dünya telükesizligini bozğan bir diktator bar demektir dep qoştı.

Bunen beraber spikerler Rusiyeniñ tam miqyaslı istilâsı neticesinde ortağa kelgen neticelerniñ üstünden kelmek içün Ukraina tarafından becerilgen areketler aqqında ayttılar. Bilhassa, Avrointegratsiya meselelerinde dijital transformatsiya naziriniñ muavini Valeriya İonan, Ukraina, iç bir şeyge baqmadan, milliy dijital-leyhalar sistemasını qurmağa ve dijital islâatnı kirsetmege yardım etken bir sürü servisni azırlamağa devam etkenini qayd etti. Ukraina halq mebusı Serğiy Babak cenk neticesinde ilim saasında ortağa kelgen zararlarnı da tilge ketirdi ve, iç bir şeyge baqmadan, bütün talebe ve ocalarnıñ talaplarını yerine ketirmek ve cenkten evel Ukrainadaki ilim sistemasınıñ muvafaqiyetlerini saqlamaq içün, Ukraina elinden kelgenini yapa dep qayd etti.

Ukrainada içtima, topraq ve infrastruktura inkişafı naziriniñ muavini Mustafa-Masi Nayem Rusiye tek Ukraina kontrol etken topraqlarda degil de, vaqtınca işğal etilgen topraqlardaki bütün infrastrukturanı da yoq ete dep ayttı. Onıñ içün adım-adım ğayrıdan tiklev ve rekonstruktsiya aqqında laf etmek müim, lâkin ğalebe içün küreşkenimizni de ep közde tutmaq kerekmiz.

Ukraina Tış işleri nazirliginiñ siyasiy departamentiniñ müdiri, eñ yaramay şey – bizim doğru bilgini tarqatmağanımız ve istilâcınıñ cinayetlerini aqqında susmamızdır dep netice çıqardı. Aynı zamanda Lübov Nepop Ukrainanıñ Afrika, Latin Amerika ülkeleri ve dünyanıñ diger regionlarındaki ülkeler ile işbirligi strategiyası aqqında ayttı.

Körüşüvniñ soñunda ukrain taraf halqara musafirlerge olarnıñ Ukrainağa teşrif etkenleri, bizim devletimizni desteklegenleri ve global içtima meseleleriniñ üstünden kelmekte birlikte çalışmağa azır olğanları içün öz teşekkürlerini bildirdi.