HALQARA QIRIM PLATFORMASINIÑ EKİNCİ QARA DEÑİZ TELÜKESİZLİK KONFERENTSIYASI AÇILDI

Halqara Qırım Platformasınıñ ekinci Qara deñiz telükesizlik konferentsiyası bugün Sofiya (Bulğaristan) şeerinde açıldı, bu konferentsiya çerçivesinde iştirakçiler rus istilâsınıñ Qara deñiz-Azaq bölgesine ve başqa memleketlerniñ telükesizlik vaziyetine tesirini talil etecek, şimdiki telükelerge qarşılıq kösterüv strategiyalarını ve regional telükesizlikniñ kelecegini müzakere etecekler. Müzakerelerniñ esas mevzusı ise ukrain Barış Formulasınıñ ömürge keçirilüvi olacaqtır.

Konferentsiyanıñ açılışı vaqtında Mudafaa Strategiyaları Merkeziniñ idarecisi, Ukraina Mudafaa Naziriniñ muavini (2019-2020) Alina Frolova; Ukraina Tışqı İşleri Naziriniñ muavini İrına Borovets; Bulğaristan Tışqı İşler Nazirliginiñ Siyasiy işler müdirliginiñ baş müdiri Gergana Karacova Ukraina Prezidentiniñ Qırım MC Daimiy Temsilcisi Tamila Taşeva çıqışlarda bulundı.

“Qara deñiz telükesizlik konferentsiyasınıñ esas maqsadı — vaqtımız olmağanını köstermek. Ukrainlerniñ episi bunu er kün, duşmanlarnıñ er bir ücümı vaqtında is ete. Bütün akimiyetler ve ortaqlarımız umumiy telükesizlik içün birleşüv zamanı kelgenini añlamalarını isteymiz”, – dep qayd etti Alina Frolova.

Konferentsiya iştirakçilerine video-bağ vastasınen muracaat etken İrına Borovets rusiyeniñ ekologik cinayetleri aqqında aytıp berdi:

“Ekologik cinayetlerniñ sıñırları yoqtur. Dünya, insanlıq tarihında ekotsidlerniñ ögüni almaq içün birleşmelidir. Ukrainanıñ Rusiye ile cekte ğalebe qazanması —  tek Qara deñizde degil de, bütün dünyada havfsızlıqnı temin ete bilecek tek çaredir”.

Halqara Qırım Platformasınıñ ekinci Qara deñiz telükesizlik konferentsiyası vaqtında Gergana Karacova bularnı qayd etti:

“Ukrainanı topraq bütünliginiñ yañıdan tiklenmesi ve rusiyeniñ tecavuzcı areketleri yeñilmesi içün Ukrainağa qol tutmağa devam etecekmiz. Bu maqsatnen Bulğaristan maddiy, arbiy, gumanitar ceetten Ukrainağa qol tutacaq ve ortaqlarnen fikirdeşlerimizniñ başqa tedbirlerine destek kösrterecek. Ortaqlarımıznıñ çoqusı Qara deñiz bölgesinde kene de barış ve navigatsiya serbestligi tiklenmesi içün yardım köstermege azır”.

Tamila Taşeva çıqışı vaqtında Rusiyeniñ on yıl evelsi Ukraina topraqlarınıñ, bu cümleden Qırım yarımadasınıñ işğalini başlağanını ve Qara deñiz ile Azaq bölgeleriniñ aman-aman episinde kontrol qurğanını qayd etti:

“2014 senesi halqara toplulıqnıñ qarşılığı yeterli olmağanı tecavuzcı devletniñ 2022 senesi tam miqyaslı istilâ başlamasına yol açtı. Rusiye, daa evel işğal etken Qırımnı arbiy baza olaraq qullanıp Ukrainağa qarşı tam miqyaslı cenk başladı”.

Tamila Taşeva nutqunda Qırımda yaşağan Ukraina vatandaşlarınıñ işğalcilerge qarşılıq areketi aqqında da söz yürsetti; sistematik olaraq insan aqlarını bozğan işğalcilerniñ cinaiy areketleri aqqında, hususan Ukraina tamır halqlarına qarşı cinayetler aqqında qayd etti; işğal altındaki topraqlarnıñ, hususan Qırım yarımadasınıñ azat etilmesi ve telükesizliniñ teminlenmesi içün bölgedeki esas memleketlerniñ ve Avropanıñ bu ketişatqa qoşulmasınıñ müimligini ifade etip, halqara toplulıqnı Ukrainağa destekni arttırmağa çağırdı.