Qırım işğali neticesinde yarımadada qurulğan devlet idare sisteması yoq etildi, vatandaş cemiyetiniñ institutları qıymetsiz oldı, Rusiye işğalci memuriyetine qoltutmağan Qırım sakinlerine qarşı repressiya ve siyasiy esaslı taqip mehanizmleri yapıldı.
Halqara toplulıq, halqara gumanitar uquq qaidelerinen qorulğan şahıslarnı avuştıruv ve sürgün etüv, yarımada ealisi yerine öz vatandaşlarını ketirüv yolunen Qırım ealisiniñ demografik terkibini zorlav deñiştirme siyasetini keçirgen tecavuzcı memleket tarafından yarımadanıñ qanunsız müstemlekeleştirilüviniñ şaatı ola. Etnik ukrainler ve qırımtatarlar ayrı zulum altındadır. Qırımtatar halqınıñ siyasiy ve medeniy aqlarınıñ bozuluvı, hususan temsiliy organı – Meclisniñ yasaqlanması, ana tilinde tasil aluv aqqınıñ bozuluvı, insanlarnı tutıp esir aluv, öldürüv, tintüv ve tutuvlar qırımtatarlarğa qarşı yapılğan ırqiy ayırımnıñ delilleri ola. Böyle siyaset neticesinde vaqtınca işğal etilgen Qırımda qırımtatar milliy müessiseler sisteması yoq etildi, qırımtatarlarnıñ milliy liderleri Qırımnı terk etmege mecbur oldı ve taqip etilgenleri içün evlerine qaytıp olamay.
Qırımtatar halqı aqlarınıñ ğayrıdan tiklenüvi ve kimliginiñ qorulması Qırımnı işğalden qurtaruv esnasınıñ ayırılmaz bir parçası ola.
Qırım işğaliniñ toqtatıluvı – Ukraina ve dünya içün çezilüvi bir çoq ceetten regionnıñ kelecek reintegratsiyasını belgileycek ve halqara toplulıq ğayretleriniñ birleştirilüvine ve halqara ortaqlarımıznen areketlerniñ koordinatsiya etilmesine bağlı bir mesele.