İşğalci küçler Emil Nazarbekov ve Arsen Cepparovnı belgisiz bir tarafqa alıp ketti.

Yalta yanında bulunğan Krasnokamenka köyünde işğalci küçler eki qırımtatarnı (Emil Nazarbekov ve Arsen Cepparov) belgisiz tarafqa alıp ketti. 

Emil Nazarbekovnıñ evinde yapılğan tintüvni işğalci küçler narkotik ve silâ arama manaçığınen keçirgen. 

Arsen Cepparovnıñ tutulması ise daa sert keçti: adamnı devirdiler, yerge yıqtılar ve başına silâ tayadılar. Eñ başında işğalci küçler öz cinayetini kamerağa qayd ete ediler, soñra ise Cepparovnı arabağa iterip kirsettiler. Bugün ise aktivistlerniñ tutulıp Aqmescitteki “ekstremizmge qarşı merkez”de sorğulanğanı, soñra ise serbest bıraqılğanları aqqında haber keldi. Hatırlatamız ki, Arsen Cepparovnıñ qanunsızca apis etilmesi, Rusiye türmesindeki deşetli şaraitte 7 yıl keçirgen soñ, daa bu sene 17 aprel künü bitti. Apiste olğan vaqıt içinde siyasiy mabüsniñ sağlığı bayağı fenalaştı, 2022 senesi oktâbr ayından ise o ep SİZOda tutuldı.